Oktâbrniñ 8-12 künleri Qırımda Temsil etilmegen halqlar ve milletler teşkilâtı prezidiumınıñ oturışı keçirilecek. Temsil etilmegen halqlar ve milletler teşkilâtı – halqara, akimiyetke bağlı olmağan teşkilât, ihtiyariy iştirak esasında qurulğan. Bu forumnıñ azaları – insan uquqlarnı qorçalamaq, özgünliklerini saqlamaq, konfliktlerni kenişletmemek gayesi ile birleşken tamır halqlar, azlıqlar, tanılmağan territoriyalar. Teşkilât 1991 senesi Gaaga şeerinde meydanğa keldi, ve şu zamandan berli bütün dünyadan 60 qadar halqnıñ problem ve meselelerini muzakere etmek içün bir meydan oldı.
TEHMT azalarınıñ vaziyeti farqlı olğanına baqmadan, episi olar bir umumiy hususiyet ile birleşeler – olar Birleşken Milletler Teşkilâtı kibi dünya teşkilâtlarında temsil etilmegenler. Neticede, dünya sanasında olarnıñ iştirak seviyesi, dünyaca belli insan aqlarını qorçalağan institutlardan yardım alma imkânları da bayağı sıñırlanğan.
Bügün konfliktlerniñ 90% devletniñ içinde olğan dünyada TEHMT halqara meydannı yaratıp, öz azalarına halqara toplulığınıñ effektiv iştirakçileri olmaq imkânını berdi. Ket-kete tarlaşqan bu dünyada öz aq-uquqlarından marum qalğanlarınıñ sesini eşitmek zaruriyeti daa da kergin meselesine çevirile. TEHMT böyle marginalizatsiyanıñ neticelerini yoq etmek, küreşleri aqqında malümatnı yayınlandırmaq, mürekkep meseleleriniñ çezüv yollarını tapmaq tırışa.
Qırımtatar Milliy Meclisi TEHMTniñ teşkilâtçılarından biri ola ve 1991 senesinden berli teşkilât faaliyetiniñ esas yönelişlerinde iştirak ete. Brüssel şeerinde 2007 senesi keçken evelki konferentsiyada teşkilâtnıñ prezidiumına qırımtatar halqınıñ temsilcesi olaraq Abduraman Egiz saylandı. Aynı konferentsiyada nevbetteki TEHMT prezidiumınıñ oturışını Qırımda keçirmek qararı çıqarıldı. Qırımtatar halqı içün TEHMT prezidiumı oturışınıñ keçirilmesi – dünya toplulığınıñ diqqatını öz vaziyeti ve milliy areketi printsiplerine celp etmek imkânıdır.
“Bizim Qırım” HCTniñ Matbuat Hızmeti