Bizim maqsadımız- köylerimizniñ tarihını canlandırmaq

11.05.20160:19

2007-2008 seneleri ilmiy etnografik ekspeditsıyasınıñ neticelerini çıqaruv çerçivesinde Qırımtatar sanaat müzeyiniñ destegi ile 13 oktãbr künü Ediye Muslimovanıñ rehberliginde ‘Tezis’ neşriyatı tarafından ülkeşınaslıq boyunca kitaplar taqdim etildi. Kitaplarda sürgünlikten evel devirge ait köyler tafsilãtlı tasvir etilgen, mesken yerlerniñ harıtaları, şu cümleden evlerniñ yerleşmesini köstergen haritalar, sürgünlikten evel yapılğan eali cedvelleri, sürgünlik aqqında şaatlarnıñ hatırlavları, mikrotoponimiya aqqında malümatlar ketirilgen. Refat Muslimovnıñ ‘Sudaqnıñ ilvanı –Qoz’, Cafer Emiraliyev tarafından azırlanılğan ‘Yuqarı Qaralez ve yuqarıqaralezliler’, Zera Bekirova ve Yusuf Cemaledinov tarafından azırlanğan Urkusta köyü aqqında ‘Doğdıq güzel Urkustada’ kibi kitaplar- ğayet qıymetli tarihiy malzeme sayılır.
Bediy redaktor Zera Akimovanıñ emegi sayesinde kitaplar pek renkli ve dülber oldı. Böyle kibi qıymetli malümatlarnı toplav ve talil etüv işlerinen oğraşqanlarnı ülkeşınaslıq edebiyatını derc etmekte beraberlikte çalışmaq içün neşriyatqa (tel. 095- 343 — 84-06), ya da ‘Avdet’ gazetasınıñ muarririyetine muracaat etmege rica etemiz.