Сентябрь 8 куню Къарасувбазар шеэриндеки (Сары-Сув къасабасы) 4-нджи миллий мектепнинъ оджалары озьлерининъ зенаатдашы, тувгъан мектеплери мейдангъа кельмеси ве инкишафына федакярлыкънен хызмет эткен маарифчи Надиля оджа Асанованы 50 йыллыкъ юбилейинен шерефледилер.
Надиля Асанова 1962 сененинъ сентябрь 2-де Таджикистаннынъ Ленинабад шеэринде догъа. 1984 сене Ленинабад педагогика институтынынъ филология болюгини битире ве мектепте чалышып башлай. 1990 сенеси Асановларнынъ аилеси бабалары Надир агъа догъгъан Акъкъая коюне коче. Дженктен эвель бу койде Надиля оджанынъ къартбабасы реис олгъан. Иш къыдырып Къарасубазар тасиль болюгине баргъан Надиля Асанованы къырымтатар тили ве эдебияты усулджысы вазифесине къабул этелер.
1991 сенеси Киевде усулджылар курсларындан кечкен Надиля Асанова къырымтатар тили ве эдебият, музыка ве эмек оджаларынана усулджылыкъ эте ве къырымтатар тасиль системининъ тикленмеси огърунда хызмет эте.
Надиля Асанова 19 йыл девамында Къарасувбазар район тасиль болюгинде къырымтатар тили ве эдебияты фенлери боюнджа усулджы оларакъ чалыша. Пек истидатлы, ишини джан-юректен бегенген, эр бир беджерген ишини алий дереджеде япкъан мутехассыстыр. Йыллар девамында районда тасиль саасында пек чокъ тедбирлер, ярышлар кечире. Атта халкъара конференция (2006с.), джумхуриет боюнджа "Йыл оджасы" ярышыны юксек севиеде кечирмеге наиль олды. Маариф, тасилимизнинъ инкишафында да салмакълы иссесини къошкъан инсандыр: къырымтатар тилли мектеплер, сыныфлар, балалар багъчаларында группалар ачылувында хызмети буюк. "Маарифчи" бирлешмесининъ фааль азасы, район "Маарифчи" бирлешмесининъ реиси вазифесини эда эте, оджалар, талебелер, ана-бабаларгъа да даима ярдымда булуна.
Надиля Асанова — ватанпервер, озь халкъынынъ садыкъ къызларындан бири, халкъымыз арасында танылгъан, урьмет-иззет къазангъан маариф хадимидир.
Сентябрь 2-де 50 яшыны толдургъан бу аджайип инсанны, садыкъ достумызны догъгъан кунюнен хайырлаймыз. Надиля ханымгъа къавий сагълыкъ, туткъан ишлеринде мувафакъиетлер тилеймиз.