Milliy Meclis reisiniñ birinci ve daa bir muavinniñ tayin etilmesi onıñ idaresini daa küçlü eter, – Nariman Celâl

23.03.20158:3914
23_03_2015_jelyal_1_0

21 mart künü Milliy Meclis toplaşuvında Nariman Celâl Meclis reisiniñ birinci muavini, Bağçasaray rayon memuriyetiniñ sabıq yolbaşçısı İlmi Umerov ise reis muavini vazifelerine tayin olundılar.
Meclisteki bu deñişmeler, birinci reisniñ vazifeleri ve Meclisniñ faaliyeti aqqında “Avdet”ke Nariman Celâl tarif etti.

-Milliy Mecliste soñki tayinlevlerniñ maqsadı nedir?

– Qırımtatar Milliy Meclisiniñ reisi mecburen Qırımda olmağanı, amma temsil organ öz işini devam etmek kerek olğanı içün Mecliste bazı deñişmeler yüz berdi. Söz serbestligi, kütleviy tedbirler, toplaşuvlar keçirmege yasaq etilmesi ve diger sebeplerden dolayı, Meclisniñ faaliyeti öz şeklini biraz deñiştirmege mecbur qaldı. Belli olğanı kibi, Refat Çubarov Qırımğa kelip olamağan soñ, onıñ vazifelerini vatandaşları arasında ürmet qazanğan Ahtem Çiygöz eda etmege başladı. Ahtem Çiygöz nezaret altında alınğan soñ Meclis strukturasını olğan imkânlarğa köre çalıştırtmağa mecbur qalğanımız añlaşıldı.

Bir qaç vaqıt devamında reis vazifelerini eda etici, koordinator kibi vazifelerni tayin etmek meselesi muzakere etile edi. Amma men yañı şeylerni uydurmayıp, artıq elimizde olğan imkânlarnen faydalanmağa çağırdım ve reisniñ birinci muavinini saylamağa teklif ettim. Neticede , bu vazifege menim namzetim kösterildi. İlmi Umerovnı ise daa bir muavin olaraq saylâp, idareligimizni qaviyleştirmege tırıştıq. İlmiy Umerov Meclisniñ eñ faal azalarından biri olıp, tecribeli, nufuzlı siyasetçidir. Daa bir muavinge ihtiyac bar edi. Belli olğanı kibi, Zaur Smirnov Meclisniñ qararı ile vazifesinden boşatılğan edi, Ahtem Çiygöz apishanede bulunmaqta, Kiyevde qırımtatar derneginiñ yolbaşçısı Aslan Ömer Qırımlı yarımadada yaşamay, Qırım müsülmanlar diniy idaresiniñ hadimi Ayder Acimambetov ise müftiyattaki işlerine vaqtınıñ büyük qısmını sarf etmege mecbur. Men aman- aman bir özüm qala edim demek mümkün. Onıñ içün böyle vaziyette İlmi ağanıñ tayinlenmesi pek doğru qarar dep sayam.

-Al- azırda Meclis reisiniñ birinci muavini vazifesinde faaliyetiñizde nasıl maqsadlar qoyasız?

– Birinciden, bulunğanımız vaziyette Meclis faaliyetini belli bir yönelişke qoymalımız. Mesele şunda ki, bir çoq vaqıt devamında biz, artıq alışılğan eski vastalar ile çalışa edik, amma zemaneniñ öz qanunları ve talapları bar. Yañı şaraitlerde Milliy Meclisniñ faaliyeti qaysı yönelişte inkişaf etmek kerek ve qırımtataralrnıñ yaşayışları nasıl devam etecegine dair çeşit fikirler mevcut. Bütün bularnı közge alıp, öz yolumıznı belgilemek kerekmiz. Belki, daa çoq haber- analitik yönelişine diqqat etip, huquqqoruyıcı faaliyetini daa teren ögrenmelimiz. Ekinciden, soñ zamanlarda eali ile işimizniñ seviyesi bayağı eksilgeninden sebep,bu saada daa çoq çalışmalımız. Yerli ve regional meclislernen de ciddiy çalışmaq kerek olacaq.

Er bir areketimizde bütün bu yıllar devamında sadıq qalğan printsiplerimizni de ebet unutmaycaqmız- milliy areketimizniñ temelinde turğan demokratik ve küreşniñ zorbalıqsız usullarınen daima qullanacaqmız. Medeniy ve gumanitar leyhalarğa qol tutacaqmız. Meclis ve Qırımda em de Qırımdan tış bulunğan qırımtatarlarnen, Vatanından tış olmağa mecbur qalğan liderlerimiznen bağ ve munasebetlerimizni de tüşünmelimiz. Bizni ayırğan degil de, aksine birleştirken, qaviyleştirgen bir munasebetler qurmaq kerekmiz.

– Milliy Meclis Qırım akimiyetinen munasebet qurmağa tırışacaqmı?

– Qırımtatarlarnıñ yaşayışınen bağlı meseleler boyunca akimiyetnen bağ tutmağa azır olğanımıznı eñ başından aytqan edik. Problemlerni ortağa çıqarmaq, olarnıñ qırımtatarlar içün eñ uyğun çezüv yollarını belgilemekte çalışmağa azırmız. Akimiyet biz körgen şeylerni körmey bile. Biz ise eki tarafqa da elverişli, kelişken orta yollarını tapmağa yardım ete bilemiz.

Akimiyet vekilleri şunı añlamaq kerekler ki, Milliy Meclis bir de bir problemlerni çezmek vazifesini öz boynuna almay, buña onıñ ne resmiy imtiyazları, ne de akimiyet organlarına ait olğan imkânları bar. Soñki vaqıtlarda akimiyet tarafından problemlerni olarnen beraber çezmek kinayeli davetleri eşitile. Biz ise böyle cevap beremiz: siz çezmek kereksiz, o siziñ vazifeñizdir. Biz ise tek yardım ete bilemiz, insanlarnıñ istek ve arzularını, haberlerni bildire bilemiz, uyğun çezüv yollarnı tevsiye ete bilemiz.

Редакция AVDET

Author: Редакция AVDET

Avdet gazetası