İlmi Ümerovnıñ sağlığı ep kerginleşe

24.08.201613:35

Keçenleri İlmi Ümerovtan alınğan analizlerniñ neticeleri yahşı degil, qanında şeker, holesterin, bilirubin köstergiçleri qarardan ziyade. Onıñ alı kün-künden zayıflaşa – qan basımı, qanında şeker köstergiçleri köterile, o alsızlana.

Bu aqta onıñ qızı Ayşe Ümerova bildirdi.

«Biz onı yoqlap barğanda bile, biznen çoq vaqıt qonuşıp olamay, yatmağa istey, oturmağa taqatı yoq. Biz hastahane memuriyetine defalarca muracaat etip, künde iç olmağanda üç kere aş ketirmege razılıq soradıq, amma vaziyet deñişmey», — dep haber etti o.

Ayşe Ümerovanıñ sözlerine köre, babası öyle de künde eki kere aşay, aqşam ve saba-üyle yemegi arasında 17 saat bar, şeker hastaları içün ise böyle büyük mesafe zarar ketire bile.

Bundan da ğayrı. Belli olğanı kibi İlmi Ümerovnıñ palatasına daa bir hastanı yerleştirgenler.

Hatırlatamız, avgustnıñ 26-da Kiyevdeki Mustaqillik meydanında İlmi Ümerovqa destek köstermek niyetinen aktsiya ötkerilecek.

«Pek ağır şaraitlerge baqmadan, babam ruhtan tüşmey, o soñunace öz fikirinde turmaq niyetinde! Er kün çeşit köşelerden babama selâmlar yollap, sağlıq tilegen insanlarnıñ adı-esabı yoq! Halqımıznıñ babama qoltutuvı onıñ ömüri ve yapqan areketleri zaya ketmegeniniñ timsalidir!»,- dep qayd etti Ayşe Ümerova.

Aynı zamanda İlmi Ümerov mahkeme qararı ile ruhiy hastalar dispanserinde bulunıp, mecburiy ekspertizadan keçmekte. Meclis reisiniñ muavini Rusiyeniñ birdemligini bozuvğa çağırğanında qabaatlana. Hastahanede İlmi Ümerovnıñ sağlığı zayıflaşıp, o atta esini coyğanı belli.

Фото аватара

Автор: Редакция Avdet

Редакция AVDET