Kezlevde devamlı hastalıqtan soñ, 66 yaşına kelip, qırımtatar milliy areketiniñ faal iştirakçisi, cemaat erbabı Narim Aşurov vefat etti.
Bu aqta özüniñ Facebook saifesinde «Maarifçi» qırımtatar ocalar assotsiatsiyasınıñ reisi Safure Kacametova bildirdi.
Tünevin, avgustnıñ 26-da, Qırımnıñ çeşit köşelerinden kelgen semetdeşlerimiz Narim Aşurovnı soñki yolğa ozğardılar.
Narim Aşurov 1951 senesi Andijan vilâyetiniñ Dardaq köyünde çoq balalı qorantada dünyağa keldi. Onıñ Keriç yarımadasınıñ Bagerovo köyünde dünyağa kelgen babası İbetulla Aşurov, cenkten evel Aqmescitteki pedagogika institutını bitirdi. Anası — Kâfiye Halilova –Kezlev civarlarında belli Halil-ocanıñ qızı, esap ocası edi. Narim Aşurov yedi balalı qorantada ekinci evlâd edi. Mektepni bitirip, o Taşkentteki tekstil institutına oqumağa kire.
Evlendi, bir qızçıq kördi, amma yaş qadını ağır hastalıqtan vefat etti. Belli bir vaqıttan soñ yañı qoranta qurdı ve ekinci nikâhından üç bala kördi.
Qırımğa avdet olğan soñ, yaqınlarınen Kezlevge kelip yerleşti. «Maarifçi» assotsiatsiyasınıñ azalarınen beraber 1997-2002 seneleri devamında Kezlevde milliy mektep açılması içün areket etti.
«Maarifçi» assotsiatsiyasınıñ azaları adından Safure Kacametova merhumnıñ yaqınları ve soy-aqrabalarına teren taziye bildirdi.
«Alçaqgöñülli, insaniyetli, vatansever Narim arqadaşımız Kezlev cemaatınıñ faal insanı edi, vatanda er kesnen beraber yerleşüvniñ ağır künlerini keçirdi, amma cemaat işlerinden içte çekilmedi, kezlevlilerniñ işançınen Qurultayğa delegat olıp saylandı ve özüniñ temiz niyetleri ve işlerinen semetdeşlerimizniñ ürmet-sayğısını qazanğan edi, bugün cenazege kelgen çoqtan-çoq insan onıñ isbatıdır», -dep qayd etti Safure Kacametova.
