Bugün, sentâbrniñ 3-de Özbekistan Prezidenti İslam Karimovnıñ cenazesi qılındı. Cenaze merasimi özbek yetekçisiniñ Samarqand şeerinde yerleşken baba evinde qılındı.
Biñlernen şeer sakinleri İslam Karimovnıñ şeer ava limanına Taşkentten ketirilgen cesedini qarşılamaq içün çıqtılar.
Ava limanından Samarqandnıñ merkezine qadar qara urbalarğa kiyingen , ellerinde güldesteleri olğan adamlar Karimovnen vedalaşmaq içün toplaştılar.
Körtej qadimiy minareli Registan meydanına yol aldı. Vedalaşuv merasimi saat 12-de başlandı. Mından İslam Karimovnıñ tabutı köterilip, Karimovnıñ ana-babası ve ağaları kömülgen Şahi-Zindan qabristanına alıp ketip kömülecek.
Soñki 20 yıl devamında Şahi-Zindanda kimseni kömmeyler, amma Özbekistannıñ birinci prezidenti içün istisna yapıldı.
Al-azırda Samarqandnıñ merkezi tek piyade yürüş içün açıq.
Anayasa boyunca, prezidentniñ vazifesini vaqtınca senat reisi Nigmatulla Yuldaşev eda etecek. Cumhuriyette üç künge matem ilân etildi.
