Oktâbr 4-te Qırımda Qırımtatar Milliy Meclisi azaları boyunca bir qaç toplaşuv, Vadim Siruknıñ şikâyet arizasınıñ baqılması, bunen beraber, Saniye Ametovanıñ işi boyunca mahkeme tartışmasınıñ keçirilmesi planlaştırıla.
Bu aqta Qırımtatar Qurultayı Merkeziy saylav komissiyasınıñ reisi Zair Smedlâyev bildire.
«Endi Meclisniñ eki azası (İlmi Umerov ve Ali Hamzin – muar.) mahküm etildi, bir sıra azağa memuriy protokollar tizildi, digerler boyunca, ğaliba, yarın, oktâbr 4-te tizilecektir, ve Bağçasaray rayon mahkemesine cezanıñ belgilemesi içün teslim etilecektir», – dep ayttı Zair Smedlâyev «Qırım.Aqiqat»qa.
Smedlâyevniñ malümatına binaen, oktâbr 4-te saat 9:30-da Qırım Yuqarı mahkemesinde Ahtem Çiygoznıñ işi boyunca mahkeme esnası devam etecek.
Saat 10:00-da Aqmescitteki Kiyev rayon mahkemesiniñ Vadim Siruknıñ apiste bulunması müddetiniñ dekabr 8-ge qadar uzattırılması aqqında qararına qarşı onıñ adliyecisiniñ şikâyet arizası baqılacaq.
Saat 12:45-te Saniye Ametova işi boyunca mahkeme tartışması keçirilecek, onı mayıs 18-de sanktsion mitingni teşkil etkeninen qabaatlaylar. Hatırlatamız ki, dava işi, şikâyet arizası baqılğan soñ, başlanğıç mahkemesiniñ bir daa baqılmasına teslim etildi.
