Türkiye Tışqı işler nazirligi Meclisniñ yasaq etilmesi boyunca beyanat yaptı

04.10.201612:26

Türkiye Tışqı işler nazirligi, Rusiye Federatsiyasında Qırımtatar Milliy Meclisi faaliyetini yasaq etmek Rusiye Yuqarı mahkemesiniñ qararı munasebetinen qasevet çekkenini bildirdi.

«Şikâyet arizası baqılğan soñ qabul etilgen yasaq etüv aqqında Rusiye Federatsiyasınıñ qararı aqqında haber qayğı ile alındı», — dep aytıla «RİA Novosti» Türkiye tışqı siyaset müessisesinden alğan beyanatında.

«Basımğa oğratılğan qırımtatarlarğa yardım etmege devam etecekmiz», – dep qayd etile beyanatta.

Avdetniñ bildirgenine köre, sentâbr 29-da Rusiye Yuqarı mahkemesi Qırımtatar Milliy Meclisini ekstremistik cemaat teşkilâtı olaraq tanıdı ve onıñ faaliyetini RF territoriyasında yasaq etti.

İyün 29-da Birleşken Milletler Teşkilâtınıñ İnsan aqları boyunca baş kâtibiniñ yardımcısı İvan Şimonoviç Rusiye Yuqarı mahkemesini Meclisniñ faaliyeti yasaq etüvini lâğu etmege çağırdı. Mayıs 12-de Avropa parlamenti Avropa birligi aza-devletlerine Meclis faaliyeti yasaqlanması içün mesüliyetli olğanlarğa qarşı sanktsiyalar kirsetmek imkânını baqmağa teklif etti.

Aprel 27-de Avropa birligi işbu qararnıñ «qırımtatar aqlarına, umumen olaraq, ciddiy ücüm» olğanını ayttı.

Amerika Qoşma Ştatları Qırımtatar Milliy Meclisiniñ yasaqlanması aqqında Rusiye Yuqarı mahkemesiniñ qararı qanuniy olğanını tanımay.

Фото аватара

Автор: Редакция Avdet

Редакция AVDET