Rusiyeli uquq qoruyıcılar Kefe regional meclisi azası Suleyman Kadırovnıñ evinde tintüv keçirilmesini yekünledi.
Qırımtatar Qurultayı Merkeziy saylav komissiyasınıñ reisi Zair Smedlâyevniñ bildirgenine köre, tintüv neticesinde Kadırovdan noutbuk ve telefon alındı.
«Tintüv, Rusiye Federatsiyasınıñ sıñırlarını tanımamaq çağıruvında ve «Asker» qırımtatar batalyonına qol tutuvında şeklenüv boyunca teşkerüvniñ keçirilmesi aqqında mahkemeci Rodionov İgor İvanoviçniñ qararına esaslanıp, keçirildi. Sanki mart 29-da yapılğan reportajda Suleyman bunı ayttı: «Qırım – bu Ukraina!», – dep yazdı Smedlâyev Facebook saifesinde.
Zair Smedlâyevniñ sözlerine binaen, yaqın künlerde Kadırovnı Aqmescitteki Ekstremizmge qarşılıq boyunca merkezge sorğuğa davet etecekleri aqqında söz berdiler.
