Novosibirsk şeerinden Aqmescitke yapılğan sefer devamında uçaqta bir yaşındaki bala parmaqsız qaldı.
Acele hızmetlerdeki menbalarnıñ malümatına esaslanğan «Life» telekanalınıñ haber etkenine köre, vaqia sentâbr ortasında yüz berdi.
Novosibirskten turist qadını Qırımğa bir yaşındaki balasınen raatlanmaq içün kete edi. Bir arada oğlançıqnıñ parmağı kreslolar arasındaki teşikke tüşti. Uçaq avada apansızdan keskin areket yaptı, ve balanıñ parmağı qırıldı.
Ava hattı hadimleri balağa ilk yardım kösterdi. Uçaq Aqmescitte qonğan soñ, oğul ekimlerge teslim etildi. Anasınıñ ava şirketine iddiası yoq. Qadın, yapılğan yaranıñ mahkeme-tibbiy ekspertizanı keçirmekten vazgeçti. Şimdiki vaqıtta uquq qoruyıcılar teşkerüv keçire.
