Çoqusı qırımtatarlar yaşağan Aqmescitteki Bor Çoqraq (Fontanı) qasabasınıñ sakinleri yaramay yollar ve cemaat naqliyesi problemalarına şikâyet ete.
Yerli sakinlerniñ Avdetke bildirgenine binaen, Aqmescit-Bağçasaray yolu buruluşından başlanğan, Çkalova soqağına ketken qasabadaki yolnıñ «kimsege keregi yoq», o, 15 yıldan ziyade tamir etilmedi.
«Er kün bu yoldan yüzlerce maşna yüre (Sabla (Partizanskoye) ve Konstantinovka köylerinden – muar.), amma o, çuqurlarnen ve qurucılıq çöplüginen olğanı kibi, öyle de 15 yıldan ziyade tura», – dep şikâyet etti yerli sakin.
Onıñ sözlerine binaen, yerli akimiyet ayta ki, bozulğan yol parçası ne şeerge, ne de rayonğa ait degil, bunıñ içün onıñ tamir etilmesine para alınacaq yer yoq.
Cemaat naqliyesi daimiy cedveli yoq olğanı, Bor Çoqraq qasabasınıñ daa bir ciddiy probleması ola. «Bor Çoqraq – Boğurça q.» 78 sanlı yerli marşrut cedvel boyunca yürmey.
Amma qasaba sakinleri, şeerde büyük tıqanıqlıqlar olğanı sebebinden aydavcılarnı degil de, daa çoq bu marşrut boyunca ayırılğan avtobuslarnıñ sayısı kerekli qadar olmağanına şikâyet ete.
«Çorlandırıcı bir şey! İç kimseniñ bizge işi yoq! Ne saba, ne aqşam ketmege imkân yoq. Bundan da ğayrı, marşrutkalarnıñ içi pek kirli, olar töpeden tolu kele (78 sanlı marşrut Bor Çoqraq qasabasından yuqarı yerleşken «Nadejda» qasabasına kire), saba Sevastopolskaya soqağından Svobodağa ketmek kerek olğan insanlar ise, asıl da minip olamay, çünki avtobus Zapadnaya avtostantsiyasında tamamen tola», – dep çorlana yerli sakin.
Onıñ sözlerine köre, Sevastopolskaya soqağınıñ tamir etilmesi sebebinden saba şeerge qadar yetmek içün bir saat ya da ziyade kerek ola.
«Bazı vaqıtları adamlar tamam marşrutkada yaramay ola», – dep ayta Avdetniñ subetdeşi.
Hatırlatamız ki, 2016 senesi baarde Aqmescit rayonındaki Bor Çoqraq qasabasında Çkalova soqağında yol qısmen tamir etildi, amma yolda tek qısmen çuqurlar toldurıldı. Qırımtatar qasabasında turaqlardan birine öyle de «Gölçik» («Luja») adı qoyuldı, o ne qışta, ne de yazda qurumay.
Qasabada, merkeziy yoldan ğayrı, elbet, köy içinde de yolsuzlıq.
Mına böyle yolcular 78 sanlı marşrutnen yüre.
