Oktâbr 2-de seneniñ ayrı dört ayından biri olğan Muharrem ayı keldi. Onıñ kelgeninen Hicriy (musulman taqvimi boyunca) 1438 senesi keldi.
Muharrem ayı – Allah tarafından cenk, dava yasaq olğan dört aydan biri ola (Recep, Zul-Kaada, Zul-Hicca, Muharrem). Muharrem ayınıñ müimligi aqqında Quran ve Sünnette çoq aytıla. Bunıñ içün er musulman bu aynı daa çoq Allahqa ibadet etip keçirmeli. İmam Ğazali «İhya» kitabında yaza ki, Muharrem ayı Allahqa ibadet ile keçirilse, diger aylarğa da bunıñ hayırı tiyecektir.
Muhammed Peyğamberimizniñ (s.a.s.) hadisinde aytıla ki: «Ramazan ayından soñ, oraza tutmaq içün eñ yahşı ay Muharremdir» (Muslim, «Sıyam», 202, 203).
Muharrem – tövbe ve Allahqa ibadet etüv ayıdır, bunıñ içün Yüce Allahtan günahlarnıñ bağışlanmasını ve hayırlı işler içün mukâfatnı almaq imkânını qaçırmamağa tırışmalı.
Muharrem ayı içinde muqaddes bir kün, yani Aşure künü bar. Bu, aynıñ onuncı künü, aynıñ eñ müim bir künüdir. İnsaniyet tarihında hususan bu kün pek çoq vaqia yüz berdi. Aynı bu kün, Yüce Rabbimiz kök ve yerni, el-arş, meleklerni, ilk insan ve peyğamber Ademni yarattı. Ahır zaman aynı bu kün olacaqtır. Bu kün peyğamberlernen bağlı çoq vaqia yüz berdi:
– Yüce Rabbimiz Adem peyğamberinden tövbeni qabul etti; Nuh gemisi Ulu afan-tufandan soñ Cudi dağına yanaştı; İbrahim peyğamberi doğdı; İsa ve İdris peyğamberleri köklerge yükseldi; İbrahim peyğamberi putperestlerniñ ateşinden qurtarıldı; Musa peyğamberi ve onıñ izdeşleri firavundan qaçtı, qaysı biri bu kün, deñizge batıp, elâk oldı; Yunus peyğamberi balıq qursağından çıqtı; Eyüb peyğamberi ağır hastalıqlardan qurtuldı; Yaqub peyğamberi oğlunen körüşti; Suleyman peyğamberi qıral oldı; Yusuf peyğamberi apisten çıqtı. Bunen beraber, bu kün Muhammed Peyğamberiniñ (s.a.s.) torunı Hüsein şeit olıp ketti.
Aşure künü, bunen beraber, arefe ve kelecek kün oraza tutmaq sünnettir. Hadislerniñ birine binaen, Aşure künü tutulğan oraza içün musulman kişi kelecek sene günahlarından temizlene, Aşure künü zerre qadar berilgen sadaqa içün Allah Uhud dağı kibi büyük mukâfat berir. Hadiste aytıla ki, «Aşure künü qorantasını aşatqan ve içirgen kimse, Allahtan sene devamında bereket alacaqtır» (Tarabani). Aşure künü ğusul abdesti alınsa, Allah bu insannı sene devamında hastalıqlardan saqlar. Aşure künü hastanı ziyaret etken kimse, Ademniñ bütün oğullarını ziyaret etken kibi olur.
Aşure künü sadaqa bermeli, Quran oqumalı, balalar ve yaqınlarnı quvandırmalı, bunen beraber, hayırlı işler yapmalı.
Bu sene Aşure künü oktâbr 11-ge rastkele.
Seyfeddin YAZICI, «İslâm dini temelleri»
