Qırımtatar Milliy Meclisi azaları Nariman Celâl, Emine Avamileva, Dilâver Akiyev ve Lenmar Yunusovğa İlmi Umerovnıñ işi boyunca şaatlar olaraq Federal havfsızlıq hızmeti Qırım idaresiniñ taqiqatçısı İgor Skripkağa sorğuğa çağıruv aqqında celpname berildi.
Bu aqta Qırımtatar Qurultayı Merkeziy saylav komissiyasınıñ reisi Zair Smedlâyev bildirdi.
Qırımtatar Milliy Meclisi reisiniñ muavini İlmi Umerov «Rusiyede yasaq olunğan cemaat birleşmesiniñ toplaşuvında iştirak etkeninen» qabaatlandı. Sentâbr 29-da Bağçasaray rayon mahkemesi Umerovnıñ 10.28 maddesiniñ 1-ci qısmı boyunca memuriy uquq bozuvı yapqanı içün qabaatlı olğanını tanımaq qararını çıqardı ve 750 ruble para cezasını belgiledi.
Belli olğanı kibi, 2016 senesi avgust 18-de çoq yıllar devamında Bağçasaray rayon memuriyetiniñ yolbaşçısı olğan, Meclis reisiniñ muavini İlmi Umerov, Aqmescitteki Kiyev rayon mahkemesiniñ qararınen, mecburiy psihiatrik ekspertizağa yollanıldı. Bundan evel Umerov, FSB hadimleriniñ malümatına esaslanıp, bildirdi ki, ekspertiza 21 kün devam etecek. Rusiye qanunlarına binaen, mecburiy psihiatrik ekspertiza 28-den 90 künge qadar devam ete bile.
2016 senesi avgust 11-de, mecburiy psihiatrik ekspertizanıñ keçirilmesi belgilengen toplaşuvda 59 yaşındaki belli qırımtatar kişi yaramay oldı. Parkinson sindromı, şeker diabeti olğan ve yürek ameliyatından keçken Umerov mahkeme zalından hastahanege alıp ketirildi. Bir qaç kün keçken soñ, onı o yerden mecburiy ekspertiza keçirmek içün psihiatrik hastahanege keçirdiler.
Sentâbr 7-de, üç afta keçken soñ, İlmi Umerov psihiatrik hastahaneden çıqarıldı.
2016 senesi aprel 26-da Qırım Yuqarı mahkemesi Qırımtatar Milliy Meclisiniñ ekstremistik teşkilât olğanını tanıdı ve Rusiyede onıñ faaliyetini yasaq etti. Sentâbr 29-da Rusiye Yuqarı mahkemesi Meclisniñ yasaq etilmesi aqqında Qırım Yuqarı mahkemesiniñ qararını tasdıqladı.
