Terroristik faaliyet alıp barğanınen qabaatlanğan Rustem İsmailovnıñ apayı Fatma bugün keçirilgen tintüv aqqında tafsilâtlı malümat bildirdi.
Fatma İsmailovanıñ sözlerine binaen, maskalı silâlı uquq qoruyıcılar evge saba saat 6-da sürip kirdi. Qorantanıñ bütün azaları yuqlay edi, kiyinmege bile yetiştirmedi.
«Olar sürip kirdi, aqayımnı birden tabanğa yıqtılar, urdılar ve kelepçe (naruçniki) taqtılar, — dep hatırlay o. — Olar bir şey aytmadı, kim olğanını aytmadı, vesiqa köstermedi, aqlar aqqında bildirmedi. Soñra bizge indememege, artqaç areket etmemege ayttılar, çünki olar taqiqat tintüvini keçire», — közünde yaş olıp, añlata qadın.
Bunen beraber o bildirdi ki, Rustem İsmailovğa, onıñ emirge imza qoymazdan evel, namaz qılmaqnı yasaq ettiler. Amma o, vesiqağa imza qoymaqnı red etti.
«Aqayım açuvlandı ve ayta: «İsteseñiz, meni öldüriñiz, amma ep bir namaz qılacam, ve sizden soramaycam». Üyken taqiqatçı çıqqan soñ, oña namaz qılmağa berdiler», — dep hatırlay qadın.
Onıñ sözlerine binaen, silâlı uquq qoruyıcılardan biri, diger eki bala (5 ve 2,5 yaşındaki oğlan) kibi qorqqan 7 yaşındaki qızğa kelip, oña bir şey aytmağa başladı, amma anası qıznı alıp ketti.
Avdetniñ bildirgenine köre, bugün, oktâbr 12-de rusiyeli uquq qoruyıcılar dindar qırımtatarlarnıñ evlerinde tintüvler keçirdi, musulmanlarnıñ bazıları yaqında acılıqtan qayttı. Aqmescitteki Boğurça (Kamenka) qasabasında yaşağan Rustem İsmailovda tintüv keçirgen soñ, uquq qoruyıcılar onıñ babası Yaqub İsmailovnıñ Qarasuvbazardaki evine yol aldı.
