Oktâbr 12-de, çarşenbe kününe keçer gecesi Qırımdaki Livadiya köyü rayonında deñiz kranı suvğa battı.
Fevqulade vaziyetler nazirliginiñ Qırım idaresi matbuat hızmetiniñ bildirgen malümatına binaen, vaqia yalıdan dört kilometr uzaqlığında saat 3:40-ta yüz berdi. Gemi Keriç limanına kete edi.
Novorossiysk şeeri Rusiye deñiz ve özen limanınıñ Qurtarıcı merkezine ait olğan deñiz kranı «Artek» bala merkezi limanında işini alıp barğan edi. Gurzuftan Aqyarğa areket etken vaqıtta aqmağa başladı, bundan sebep suvğa battı.
Gemide, ilk malümatlarğa binaen, Novorossiysk sakinleri olğan sekiz adamdan ibaret erkân bar edi, olardan beş kişi «Derzkiy» buksirine alındı, daa üç kişini qıdıralar.
Vaqia yüz bergen yerge, bunen beraber, üç ğayıp olğan erkân azasını qıdırmaq içün, Yalta şeeriniñ Rusiye Fevqulade vaziyetler nazirliginiñ «Lider 11» kateri, Rusiye FVN-niñ Mİ-8 vertolötı yollanıldı.
Qayd etmek kerek ki, qıdıruv işleri ava vaziyeti sebebinden mürekkepleşe – deñizniñ dalğalanuvı 4 baanı teşkil ete. Rusiye Fevqulade vaziyetler nazirliginiñ Qırım boyunca Baş idaresi hadimleri Livadiya yalısında patrul teşkil etti.
Qurtarılğan 5 erkân azası Balıqlavağa ketirildi, bu yerde olarnı acele tibbiy yardım hadimleri, bunen beraber, Rusiye FVN-niñ ruhiyatçıları bekley edi.
Şimdiki vaqıtta erkânnıñ qalğan üç azası – üyken mehanik, elektrik mehanik ve krancı qıdırıla.
Saat 8:40-ta Rusiye Fevqulade vaziyetler nazirliginiñ «Lider 11» kateri qıdıruv işleri keçirilgen yerde deñiz kranınıñ ayrı parçalarını, qurtarıcı yelek ve qurtarıcı alqanı taptı.
Qıdıruv-qurtarıcı işleri devam ete. Umumen olaraq, bu işlerge 110 kişi ve 19 tehnika aleti celp etildi, Rusiye FVN-den 47 kişi ve 8 tehnika aleti çalışa.
