Oktâbr 13-te Qırım sağlıq saqlav naziri Aleksandr Golenko Semaşko adına hastahaneniñ baş ekimi vazifesine Aleksandr Ostapenkonıñ tayinlengeni aqqında ilân etti.
«Nazir kollektivge Semaşko adına hastahaneniñ yañı baş ekimini – Aleksandr Ostapenkonı taqdim etti. O, Qırım klinik ftiziatriya ve pulmonologiya merkeziniñ yolbaşçısı edi. Baş ekim bugünki künden (oktâbr 13-ten – Avdet) başlap vazifesine buyurdı», – dep bildirdiler «Krıminform» agentligine Qırım sağlıq saqlav nazirliginiñ matbuat hızmetinde.
Qırım yolbaşçısı Sergey Aksönov Semaşko adına cumhuriyet klinik hastahanesiniñ baş ekimini ve onıñ muavinlerini vazifelerinden boşatmağa avale etti, bunıñ sebebi, hastahane baş kâtibiniñ orta aylığı soñki sekiz ay devamında, belli olğanı kibi, 550 biñ rubleni teşkil etkeni oldı. İşbu vaqia boyunca taqiqat alıp barıla.
