Rusiyeli adliyeci Nikolay Polozovğa qarşı Qırımda cinaiy iş açacaq olalar.
Adliyeciniñ aytqanına köre, eki madde boyunca taqiqattan aldın teşkerüv keçirile – «ükümet temsilcisini aqaretlev» ve «mahkeme ve esnas iştirakçilerine nisbeten ürmetsizlik».
«Bu yerde olar qabaatlaycaq olğan maddelerniñ sanları degil de, amma imayege yapılğan basım müimdir. Çoq qırımtatar adliyecisine köre, men, uzaqtan kelgen insan olaraq, biraz ziyade serbestim. Olarnıñ o yerde (Qırımda – Avdet) qorantaları yaşay, ve olarnı sıqıştırmaq pek qolay», – dep qayd etti Polozov hromadske.ua içün bergen intervyusında.
Onıñ fikrince, rusiyeli ükümet, qırımtatarlarnı qorçalamaq havflı olğanını, bunen beraber, Rusiyede ukrain siyasiy mabuslarını qorçalamaq «kereksiz, zararlı» olğanını onıñ misalinde köstermege istey.
Adliyeciniñ bildirgenine köre, şimdilik onıñ Qırımda öz işini toqtatmağa niyeti yoq ve o, Ahtem Çiygoznı imaye etmege devam ete.
