Öz ikâyeñni yaşlar içün hatırla: Arsen Alçikovnıñ hatıraları

18.10.201613:20

Qırımtatar milliy areketiniñ belli, ürmetli veteranı Arsen Alçikov 1966 senesi onda nasıl hatıralarını qaldırğanını añlattı.

1966 s. Yaz. Taşkent talebeligi tarafından teşkil etilgen Cumhuriyet yaşlar toplaşuvı keçirildi. Toplaşuv, sanki toy, dep keçirilgen edi (kiyevniñ adı Ahtem edi, toy Akkurgan şeerinde keçirilgen edi). Toplaşuvda 1921 senesi oktâbr ve 1917 senesi noyabr ayındaki tarihlarğa bağışlanğan merasimler muzakere etilgen edi.

1966 s. oktâbr 21-de çeşit institutlardan başlarında qara sarğı olğan 15 talebe Taşkentte Şot Rustaveli abidesi yanında numayış teşkil etti.

1966 s. noyabr 7, Taşkent. Numayış keçirilgen vaqıtta qırımtatar taqımı, Ş. Raşidov (Özbekistan Kommunist Firqası Merkeziy Komitetiniñ kâtibi) turğan minber yanında keçip, «Qırımtatarlarnı Qırımğa qaytarıñız» yazısınen levha köterdi, levhanı Ahmet Asanov köterdi. Qırımtatar kolonnası ögünde çalğıcılar kete edi: Enver Kamburov, Rustem, Leman ağa ve digerler. Olar qırımtatar nağmelerini icra etken edi.

Avdet büyüklerimizni davet ete: öz ikâyeñizni, bizler, yaşlar içün, hatırlañız. Bu, bizni ruhlandıracaq ve bizge küçlü ve alicenaplı olmağa yardım etecek. Bundan evel milliy areket veteranı Server Abkerimov hatıralarınen paylaştı.

Фото аватара

Автор: Редакция Avdet

Редакция AVDET