İlmi Umerov FSB-de eki ekspertiza neticelerinen tanış oldı

21.10.20168:40

Qırımtatar Milliy Meclisi reisiniñ muavini İlmi Umerovğa FSB-de sorğuda, tanış olmaq içün, lingvistik ve mahkeme-psihiatrik ekspertizalarnıñ eki netice taqdim etildi.

Bu aqta oktâbr 20-de İlmi Umerov bildirdi.

«Adliyecilernen beraber FSB taqiqatçısında oldım. Bizni birden eki ekspertizanen tanış ettiler: lingvistik ve mahkeme-psihiatrik. Ekisinde de netice beklegenimiz kibi oldı. Lingvistik ekspertizanıñ neticesine binaen, mart 19-da ATR-de aytqan lafımda Rusiye topraq bütünligini bozmaq çağıruv bar, ekincisi ise, psihiatrik, ayta ki, menim ruhiy hastalıqlarım yoq. Yañı bir şey yoq», – dep añlattı o Facebook saifesinde.

Belli olğanı kibi, 2016 senesi avgust 18-de çoq yıllar devamında Bağçasaray rayon memuriyetiniñ yolbaşçısı olğan, Meclis reisiniñ muavini İlmi Umerov, Aqmescitteki Kiyev rayon mahkemesiniñ qararınen, mecburiy psihiatrik ekspertizağa yollanıldı. Bundan evel Umerov, FSB hadimleriniñ malümatına esaslanıp, bildirdi ki, ekspertiza 21 kün devam etecek. Rusiye qanunlarına binaen, mecburiy psihiatrik ekspertiza 28-den 90 künge qadar devam ete bile.

2016 senesi avgust 11-de, mecburiy psihiatrik ekspertizanıñ keçirilmesi belgilengen toplaşuvda 59 yaşındaki belli qırımtatar kişi yaramay oldı. Parkinson sindromı, şeker diabeti olğan ve yürek ameliyatından keçken Umerov mahkeme zalından hastahanege alıp ketirildi. Bir qaç kün keçken soñ, onı o yerden mecburiy ekspertiza keçirmek içün psihiatrik hastahanege keçirdiler.

Sentâbr 7-de, üç afta keçken soñ, İlmi Umerov psihiatrik hastahaneden çıqarıldı.

2016 senesi aprel 26-da Qırım Yuqarı mahkemesi Qırımtatar Milliy Meclisiniñ ekstremistik teşkilât olğanını tanıdı ve Rusiyede onıñ faaliyetini yasaq etti. Sentâbr 29-da Rusiye Yuqarı mahkemesi Meclisniñ yasaq etilmesi aqqında Qırım Yuqarı mahkemesiniñ qararını tasdıqladı.

Фото аватара

Автор: Редакция Avdet

Редакция AVDET