Oktâbr 21-de Aqmescitte Vorovskogo soqağında «Moskva» musafirhanesi yaqınlarında yüz bergen qaza neticesinde elâk olğan kişiniñ adı Eskender Murtazayev. Qaza, Eskender Murtazayev öz evi azbarına kirgen vaqıtta oldı. Oña Toyota Land Cruiser uruldı. Ondan ğayrı, maşnada onıñ apayı bar edi, o sağ qaldı, amma reanimatsiyağa tüşti.
Vaqia şaatlarınıñ bildirgenine köre, qorantanıñ 8 balası bar (bundan evel 7 bala aqqında aytılğan edi). Apay-aqaynıñ Aqmescitte ticariy noqtası bar.
«21 ve 20 yaşındaki büyük oğulları maşnalarnı tamir ete, elleri altın kese. Bir qızı, ya gimnastika, ya oyunnen oğraşa. Pek yahşı qoranta!» – dep yazdı içtimaiy ağlarda elâk olğan kişiniñ qomşularından biri.
Avtomobilniñ Donetsk nomerleri bar, amma aile çoq yıl devamında Aqmescitte yaşay, maşnanı yaqında satın aldılar ve nomerini deñiştirip yetiştirmediler.
