Tünevin Keriçte yedi yaşındaki bala bombalardan saqlağan açıq sığınaq quyusına yıqıldı. Vaqia Ordjonikidze, 123-a adresi boyunca yerleşken ev azbarında yüz berdi.
Oğlannı onıñ qartbabası ve yardımğa çapıp kelgen qomşusı qurtardı. Birinci sınıf talebesi quyudan maşnanıñ buksir arqanı vastasınen çıqarıla edi.
Zararlanğan balanıñ qartbabasınıñ aytqanına köre, onıñ torunı tayıp yıqıldı ve açıq quyuğa tüşti.
«Azbarımızda balalar oynacaq yer az… Epimiz qorqtıq», – dep ayttı o.
Yahşı ki, bala tek qorqtı ve bugün endi mektepke bardı, amma oğlannıñ yaqınları alâ daa şoktalar.
Bombalardan saqlağan sığınaq quyusı yıllar devamında açıq tura. Çoyun lük (qapaq) endi çoqtan hırsızlandı. Bir qaç yıl evel bu açıq quyuğa bala endi tüşken edi. Bundan soñ quyu beton taşnen qapatıldı, amma bu da hırsızlandı.
«Keçken sene kommunal hızmetleri bu yerde nasıldır işler alıp barğan edi: bu yerde qırmızı şerit qoyuldı. Amma, ğaliba, işniñ devamı olmadı», – dep qoştı vaqia şaatı, dep bildire Kerch.FM.