Qırımtatar zabitleri birliginiñ reisi, aviatsiya polkovnigi Server Tairov Alupkadaki Amet-Han Sultan müzeyinde vazifesinden boşatıldı.
Bu aqta qırımtatar cemaat erbabı Nuri Bekirov bildirdi. Onıñ malümatına binaen, qırımtatar sanat müzeyiniñ reberleri onen añlaşmanı devam ettirmedi.
«Soñki yıllar devamında Alupkadaki Amet-Han Sultan müzeyi tek «Amet-Han Sultannıñ mühlisleri» Mustafa Mustafayev ve Server Tairovnıñ faal işi neticesinde, olarnıñ bilgileri, itibarı, energiyası, bağları, çoq dostları ve tanışları olğanı içün saqlanıla ve inkişaf etken edi… Ya da Qırımda efsaneviy uçucı ve qırımtatar halqınıñ Vatanına avdeti içün küreşçi Amet-Han Sultannı populârlaştırmaq istenmezmı oldı?» – dep ayttı Nuri Bekirov.
Bugün, oktâbr 25-te qırımtatar qaramanı Amet-Han Sultan doğğanından 96 yıl toldı.
