Qırımtatar Milliy Meclisi reisiniñ muavini Ahtem Çiygoznıñ işi boyunca mahkemede eki şaat 2014 senesi fevral 26-da qabaatlanğannı körmegenini ayttı.
Bu aqta Çiygoznıñ adliyecisi Nikolay Polozov bildirdi.
Adliyeciniñ malümatına binaen, birinci olaraq, sorğuğa qabaatlav şaatı Stetsenko Viktor Viktoroviç davet etildi, o, 2014 senesi fevral ayında Aqmescitteki Kiyev rayon militsiya bölüginde cinaiy qıdıruvnıñ üyken operativ vekâletlisi vazifesini eda etken edi.
«Şaatnıñ sözlerine binaen, fevral 26-da o, işdeşleri ile beraberlikte, Qırım Muhtar Cumhuriyeti Yuqarı Şurasına cemaat tertibini saqlamaq içün yollanıldı. Şaat Stetsenko suallerniñ çoqusına cevap berip olamadı, bunıñ sebebi, çoq vaqıt keçkeni ve o endi hatırlamağanı olğanını ayttı», – dep yazdı Polozov Facebook saifesinde.
Adliyeciniñ malümatına binaen, 2014 senesi fevral 26-da Stetsenko işdeşlerinen beraber talimat alğan edi, o yerde olarğa Qırım MC Yuqarı Şurası yanında qanunsız miting keçirilecegi aqqında ilân etildi.
«Şaat ve onıñ 10 işdeşi bina kirişi yanında buluna edi, bundan soñ narazılıq bildirgen eki gruppa arasında turdılar. Şaat iç cinayet alâmetlerini körmedi. Ahtem Çiygoznı bu kün körmedi, onıñ areketleri aqqında bir şey bildirip olamadı», – dep ayttı adliyeci.
Polozovnıñ sözlerine binaen, bundan soñ zararlanğan Hudonosov Viktor Mihayloviç sorğuğa çekildi. Bundan evel o, mahkemege ariza bergen edi, vesiqada Kiyevge ketkeni içün deliller ketirip olamağanı aqqında bildirile.
«Kiyevge işnen barğanda bildim ki, Hudonosov 2014 senesinden başlap, memuriy sıñırdan keçmegen edi. Bugün deliller ketirgende Hudonosov añlattı ki, bir yerge çıqmağan edi, arizanı ise, Kiyevge onıñ qomşusı ketkeni, Hudonosov da ketecek olğanı içün yazdı. Amma qomşusı barıp olamadı, ve Hudonosov da barmaqtan vazgeçti», – dep qayd etti adliyeci.
Polozovnıñ sözlerine binaen, Hudonosov ketirgen delillerden añlaşıla ki, 2014 senesi fevral 26-da o rusiyeli telekanalnı seyir etken edi, o yerde Qırım MC Yuqarı Şurası yanıda olıp keçken vaqialar kösterile edi.
«O, ameldeki ükümetke qol tutmaq kerek olğanı aqqında qarar aldı ve QMC Yuqarı Şurasına keldi. O yerde o, sıquvdan zararlandı, hastahanege ketirildi, onıñ qaburğaları sıñğan eken. Ahtem Çiygoznı körmedi, onıñ areketleri aqqında bir şey aytıp olamadı», – dep qayd etti rusiyeli adliyeci.
Bu afta Ahtem Çiygoznıñ işi boyunca mahkeme toplaşuvları salı ve cumaaqşamı künleri saat 9:30-da keçirilecek.
Avdetniñ evel bildirgenine köre, «fevral 26» işi boyunca zararlanğanlar ayta ki, Ahtem Çiygoznı 2014 senesi Qırım parlamenti yanında yüz bergen nizamsızlıq vaqtında körmedi.
Ahtem Çiygoz Aqmescit SİZO-sında 2015 senesi yanvar ayından başlap buluna, o, Rusiye Federatsiyası Cinaiy kodeksiniñ 212 maddesi 1-ci qısmı («kütleviy nizamsızlıqnı teşkil etüv») boyunca qabaatlana, madde boyunca qabaatlanğan kişi 10 yılğa qadar apiske qapatıla bile.
2016 senesi aprel 26-da Qırım Yuqarı mahkemesi Qırımtatar Milliy Meclisiniñ ekstremistik teşkilât olğanını tanıdı ve Rusiyede onıñ faaliyetini yasaq etti. Sentâbr 29-da Rusiye Yuqarı mahkemesi Meclisniñ yasaq etilmesi aqqında Qırım Yuqarı mahkemesiniñ qararını tasdıqladı.
