Qırımtatar müzeyi Bağçasarayda universitet açacaq

25.10.201616:25

Qırım tarihiy müzey-qoruğı ve İsmail Müftiy-zade adına İlim ve tasil inkişafı merkezi Bağçasarayda şahsiy aliy oquv yurtunı – İçtimaiy institutnı açmağa planlaştıra.

Bu aqta Qırım tarihiy müzey-qoruğınıñ tesisçisi Guliver Altın bildirdi.

Onıñ sözlerine binaen, işbu müessise, şeer inkişafına destek kösterecek ve ameliy ilim ve medeniyetlerara subetniñ inkişafı merkezi olacaqtır.

«Endi eminmiz ki, devletniñ yetekçi aliy oquv yurtları ve İlim akademiyaları kelecekte teşkil etilecek institutqa destek kösterecek, bu yerde belli alimler ders berecek (mahsus cedvelge binaen). Avropa birligi devletlerinden ve diger devletlerden bazı alimler leyhağa qol tutqanları ve iştirak etecekleri aqqında bildirdi», – dep añlattı Altın.

Bloger Muhamed Ali Sulaymanovnıñ malümatına binaen, aliy oquv yurtu «kreativ usullar ve interaktiv ögretüv usulı vastasınen aliy tasil berecektir».

«Eñ başından bütün yönelişler boyunca startup-ameliyathane ve biznes-inkubator çalışmasınıñ başlanması planlaştırıla, bu yerde talebeler biznes ve içtimaiy ayat saalarında öz leyhalarını ömürge keçirecek», – dep yazdı Sulaymanov Facebook saifesinde.

Bunen beraber, Muhamed Ali Sulaymanov qayd etti ki, institut ortaqlarnen beraberlikte ilim ve biznes birleşmesi boyunca tek forumlar ve konferentsiyalarnıñ teşkil etilmesinen degil de, amma malümat ve innovatsion tehnologiyalar, halqara ticariy-iqtisadiy ve ilmiy-medeniy munasebetler, turizm, köy hocalığı ve istisal saalarında leyhalarnı ömürge keçirilmesinen oğraşacaq.

Фото аватара

Автор: Редакция Avdet

Редакция AVDET