Mustafa Mauşevniñ memuriy işi boyunca mahkeme toplaşuvı, mahkemeci hastalanğanı sebebinden, noyabr 2-ge keçirile.
Bu aqta Qırımtatar Qurultayı Merkeziy saylav komissiyasınıñ reisi Zair Smedlâyev bildirdi.
Qırımtatar Milliy Meclisi azası Mustafa Mauşev onıñ işi boyunca mahkeme toplaşuvınıñ qırımtatar tilinde keçirilmesini talap etken edi.
Avdetniñ bundan evel bildirgenine köre, qırımtatar faalleri İlmi Umerov, Şevket Kaybulla, Sadıh Tabah, Ali Hamzin, Enver Kurtiyev, Bekir Mamutov, Emine Avamileva, Dilâver Akiyev Qırımtatar Milliy Meclisi (Rusiye Federatsiyasında ekstremistik teşkilât olaraq tanılğan) toplaşuvında iştirak etkenleri içün para cöremesinen cezalandı.
2016 senesi aprel 26-da Qırım Yuqarı mahkemesi Qırımtatar Milliy Meclisiniñ ekstremistik teşkilât olğanını tanıdı ve Rusiyede onıñ faaliyetini yasaq etti. Sentâbr 29-da Rusiye Yuqarı mahkemesi Meclisniñ yasaq etilmesi aqqında Qırım Yuqarı mahkemesiniñ qararını tasdıqladı.
