Bağçasaray şeer memuriyetine tarihiy binanıñ yıqtırılmasını Medeniy asabalıq saqlavı boyunca Devlet komitetinden uyğunlaşma alınacağına qadar toqtatmaq kerek olğanı aqqında oktâbr 21-de qabul etilgen emir yollanıldı.
Bu aqta Qırım tarihiy müzey-qoruğınıñ tesisçisi Guliver Altın, Bağçasarayda Lenin soqağı, 97 adresi boyunca yerleşken binanıñ yıqtırılması qanuniyeti meselesi boyunca faal Anna Koçetova alğan mektüpke esaslanıp, bildire.
Bağçasarayda, Hanlar sarayı yanındaki tarihiy binalardan birini yıqmağa başladılar. Memuriyet yolbaşçısı Aleksandr Trânovnıñ bildirgenine köre, bina alınıñ qazaiy olğanı tanıldı ve onıñ yıqtırılması kerek. Buña memurnıñ tehnikiy neticesi bar.
Mektüpte bildirilgenine köre, Bağçasarayda Lenin soqağı, 97 adresi boyunca yerleşken binanıñ yıqtırılması boyunca işler, Han sarayı qorulğan zonasında leyha azırlama ve işler alıp barılması Devlet komitetiniñ uyğunlaştırılması olmadan, alıp barılğan edi, bu bina işbu zonağa kire.
«Han sarayı qorulğan zonasınıñ nizamı boyunca, medeniy asabalıq saqlavı saasında icra akimiyeti organınıñ mütenasip uyğunlaştırması olmadan, milliy körüniş (manzara, tarihiy körüniş) saqlanması, şeer quruvı, mimarcılıq ya da manzaranı deñiştire bilgen işlerniñ, qurucılıq, yol, topraq işleriniñ alıp barılması yasaqtır», – dep aytıla mektüpte.
