Oktâbr 28-de Aqmescitte Yaltinskaya soqağında Cuma Cami temeli qoyulmasına bağışlanğan tantanalı merasim keçirildi, bu yarımada musulmanlarınıñ esas diniy obyekti olacaqtır.
Merasimde Qırım ükümet ve parlamenti temsilcileri, bunen beraber, şeer akimiyeti ve din erbapları iştirak etti, dep bildire 3652.ru.
Qırım musulmanları diniy idaresi (QMDİ) matbuat hızmetiniñ bildirgenine köre, açılış merasimi duanen başlandı. Bina qurulacaq yerde qurban çalındı.
Qırım müftisi hacı Emirali Ablayev birinci sırada qurucılıq malasını betonğa toldurdı, bundan soñ büyük qarıştırıcılarnıñ idare pultınıñ dögmesine bastı ve beton qoyulması başlandı.
3,088 ga meydanında cami, idare ve musafir binaları olacaq. Cami 2 qısımdan ibaret olacaq – esas bina ve iç azbarı. Binanıñ köşelerinde 50 metrlik 4 minare qurulacaq. Azbarda abdest alınması içün şadırvan yerleştirilecek. Caminiñ qoşma tıştan kiriş-çıqışları olacaq. Bütün kirişler aynı vaqıtta tahliye çıqışları ola. Abdesthanelerge kiriş binanıñ ög tarafından olacaq.
Umumen olaraq, Cuma caminiñ ibadethanesinde birden 2600 insan buluna bilecek. Büyük diniy bayramlar künleri musulmanlar iç azbarında da namaz qıla bilecek, bu yerde birden tahminen 800 adam buluna bile.
