Noyabr 1-de Qırımda «fevral 26» işi boyunca eki mahkeme toplaşuvınıñ keçirilmesi planlaştırıla.
Bu aqta «Qırım mabusları» Facebook saifesinde bildirile.
Faallerniñ qayd etkenlerine köre, saat 9:30-da Qırım Yuqarı mahkemesi binasında Qırımtatar Milliy Meclisi reisiniñ muavini Ahtem Çiygoznıñ işi boyunca mahkeme toplaşuvınıñ keçirilmesi planlaştırılğan.
«Saat 13:00-te Aqmescit Merkeziy rayon mahkemesi binasında «fevral 26» işi boyunca yaqalanğan Ali Asanov ve Mustafa Degermenci mahküm etilecek», – dep aytıla beyanatta.
Avdetniñ bildirgenine binaen, 2016 senesi iyül 20-de mahkeme «fevral 26» işini bölmek qararını aldı, Ali Asanov ve Mustafa Degermencini oktâbr 8-ge qadar apiste qaldırdı. Bundan soñ, oktâbr 7-de Ali Asanov ve Mustafa Degermenciniñ apiste bulunma müddeti 2017 senesi yanvar 7-ge qadar devam ettirildi.
Hatırlatamız ki, Qırımnıñ İçki rayonındaki Ferngeym (Urojaynoye) köyü sakini Ali Asanov 2015 senesi aprel 17-de yaqalandı. Belli olğanına köre, Ali Asanov, dört balanıñ babası ola, olarnıñ eñ kiçigi, babası SİZO-da bulunğan vaqıt doğdı.
Mustafa Degermenci 2015 senesi mayıs 7-de yaqalandı.
Taqiqatnıñ noqta-i nazarına binaen, Ali Asanov ve Mustafa Degermenci 2014 senesi fevral 26-da Qırım parlamenti binası yanında keçirilgen miting neticesinde yüz bergen kütleviy nizamsızlıq istirakçileri oldı.
2016 senesi aprel 26-da Qırım Yuqarı mahkemesi Qırımtatar Milliy Meclisiniñ ekstremistik teşkilât olğanını tanıdı ve Rusiyede onıñ faaliyetini yasaq etti. Sentâbr 29-da Rusiye Yuqarı mahkemesi Meclisniñ yasaq etilmesi aqqında Qırım Yuqarı mahkemesiniñ qararını tasdıqladı.
