Ahtem Çiygoznıñ adliyecisi Nikolay Polozovğa, qırımtatarlarğa qol tutqanı içün, milliy qalpaq ediye etildi.
Böyle şekilde minnetdarlıq bildirmege qırımtatar faalleri ve milliy areket veteranları qarar aldı. Ediye tünevin, Ahtem Çiygoznıñ işi boyunca mahkeme toplaşuvınıñ teneffüsinde bağışlandı.
Polozov birden qalpaqnı kiyip baqtı ve Twitterde ediye aqqında añlattı, o yerde qırımtatarlarğa olarnıñ ana tilinde teşekkür bildirdi.
Farqlı senelerde böyle ediyelerni qırımtatarlarğa qol tutqan belli şahıslar alğan edi. Olarnıñ arasında Qırım ükümetiniñ sabıq yolbaşçısı, endi vefat etken Vasiliy Cartı oldı – oña qalpaq Aqmescitteki Yaltinskaya soqağında Cuma Cami qurulması içün topraq ayırılması aqqında qarar alınğan soñ ediye etildi, amerikalı milliarder George Soros, qırımtatar leyhalarına qol tutqanı içün, bundan da ğayrı, amerikalı siyasetşınas Zbignev Bjezinskiy, bir sıra ecnebiy devlet erbapları ve diplomatları böyle ediyeniñ saipleri oldı.
