«Hizb ut-Tahrir» işi boyunca Yaltada yaqalanğan altı kişi mecburiy psihiatrik ekspertizadan keçirilecek.
Bu aqta malümatnı adliyeci Edem Semedlâyev bildirdi.
Onıñ sözlerine binaen, İlmi Umerovnıñ misalinde, «Hizb ut-Tahrir» işi boyunca yaqalanğanlar psihiatrik ekspertizadan keçmekni red etti.
«Buña cevap olaraq, taqiqatçı mecburiy psihiatrik ekspertiza keçirilmesi aqqında qarar çıqardı. Bu, balalarğa basım sayılır, dep tüşünemiz, çünki cezalandırma tibbiyet er vaqıt mahküm etilgenlerge basım olaraq qullanılğan edi», – dep qayd etti Semedlâyev Facebook saifesinde yerleştirgen video muracaatında.
Adliyeciniñ fikrince, bu iş boyunca keçken altı yaqalanğan kişiniñ er biri bu ekspertizadan keçirilecektir.
Bu sene fevral 11-12 künleri Rusiye uquq qoruyıcıları Qırım musulmanlarınıñ evlerinde bir sıra tintüvler keçirdi. Umumen olaraq, 14 adam tutulğan edi, olardan dört kişi yaqalandı: İnsan aqları boyunca kontakt gruppasınıñ azası, Yaltalı Emir-Üsein Kuku, Yalta rayonı sakini Enver Bekirov, Aluşta regionınıñ sakini Muslim Aliyev ve Yaltalı Vadim Siruk.
Olar, Rusiye Federatsiyası Cinaiy kodeksi 250.5 maddesiniñ 2-ci qısmı («Terroristik teşkilâtnıñ faaliyetini teşkil etüv ve böyle teşkilâtnıñ faaliyetinde iştirak etüv») boyunca qabaatlana.
2016 senesi aprel ayında aynı «Hizb ut-Tahrir» teşkilâtınen bağlı olğanında şeklenilgen Refat Alimov yaqalandı.
Qırım Yuqarı mahkemesi sentâbr 16-da «Hizb ut-Tahrir» işi boyunca yaqalanğan Muslim Aliyev, Arsen Cepparov ve Refat Alimovnıñ apiste bulunma müddetiniñ dekabr 8-ge qadar uzattırılmasına qarşı şikâyet arizasını lâğu etti.
