Qırım Rusiyege qoşulğanından eki yıl keçken soñ, yarımada sakinleri evel ukrain banklarında alğan kreditlerini ödemege başlamaq mecbur olacaq.
Bu qaideler 2015 senesiniñ soñunda qanun tarafından kirsetilgen, amma bu, regionda içtimaiy kerginlikke yol bermemek içün, alâ daa ömürge keçirilmegen edi, dep yaza «Kommersant».
Qırım Yatırımcılar qoruv fondu (YQF) saytında Qırım vatandaşlarından ukrain banklarında alınğan kreditler boyunca borclarnı qaytarmaq aqqını alğan teşkilâtlarnıñ cedveli peyda oldı.
Devlet nizamı vastasınen Qırım sakinlerinden ukrain kreditleri boyunca borclarnı qaytaruvnıñ narazılıqqa yol bereceginden ekspertlerniñ şübeleri yoq.
Yarımada sakinleri Ukraina banklarındaki borclar Qırımnıñ Rusiyege qoşulmasınen yoq olacaq, dep işana edi.
Qırım yolbaşçısı Sergey Aksönov da ukrain banklarına borclarnı tölememege çağırğan edi.
Yaqında Qırımdan Devlet duması deputatı Andrey Kozenko işandırğan ki, kreditlernen bağlı meseleler çezilecek ve Qırım sakinleri ukrain kreditler aqqında raatsız olmamalı.
Buña köre, ukrain kreditleri boyunca borclarnıñ, YQF-nıñ iştiraginen bile, qaytarılması, yapılması ağır olğan vazife kibi körüne.
«Qırım eki yarım yıl evel qoşuldı. Üç sene müddeti keçmesi yaqında yekünlenecek. Bunı da köz ögünde tutmalı», – dep qayd ete BMS Law Firm ortağı Denis Frolov.
