Qırımda Gasprinskiy adına institut teşkil etildi

10.11.201614:00

Bağçasarayda İsmail Gasprinskiy adına Avrasiya içtimaiy institutı açıla.

İşbu muhtar ğayrı ticariy aliy tasil teşkilâtınıñ teşkil etilmesi aqqında tesis añlaşması noyabr 8-de imzalandı. İnstitut, Qırım tarihiy müzey-qoruğı ve İlim ve tasil inkişafı merkezi tarafından tesis etildi.

«Bu, asırlar devamında öz tasil ve ilim merkezlerinen belli olğan Bağçasarayda aliy oquv yurtunıñ teşkil etilmesiniñ ilk adımıdır», – dep bildirdi Qırım tarihiy müzey-qoruğınıñ tesisçisi Guliver Altın.

Onıñ sözlerine binaen, Avrasiya institutı, tarih, medeniy asabalıq obyektleri saqlav, turizm, leyha idare etüvi, biznes, halqara iqtisat, yatırım faaliyeti, içtimaiy-gumanitar araştırma, halqara munasebetler (diplomatiya) ve diger saalarda mütehassıslarnı azırlaycaq ilmiy-araştırma ve oquv-ameliy müessise olacaqtır.

Müessisede Rusiyede ve Avrasiyanıñ diger devletlerinde belli olğan oquv yurtlarınıñ yetekçi mütehassısları çalışacaq.

Bundan da ğayrı Altın qayd etti ki, talebeler «oquv + iş» usulı boyunca tasil alaçaq, bu ise, talebelerniñ em oquv ceryanında, em de institutnı bitirgen soñ işke kirmesini qolaylaştıracaq. Aliy oquv yurtu mezunlarına iş teklif etilecek. Böyle maqsat ile, institut yanında start-up ameliyathaneler ve biznes inkubator teşkil etilecek, bu yerde kerçek sektornıñ şirketleri çalışacaq. Bu işke ortaqlarnıñ celp etilmesi planlaştırıla.

«İnstitut, Avrasiya devletlerinden ziyalılarnıñ celp etilmesi yardımınen Qırım inkişafı boyunca yañı fikirler peyda olacaq meydançıqlardan biri olacaqtır. Bu, Bağçasaray rayonında ola bilecek Avrasiya intellektual klasteriniñ başlanuvıdır. İnstitut avrasiyalı büyük şeerlerde medeniy-iqtisadiy işbirlik Avrasiya platformasınıñ teşkil etilmesi boyunca esas müessise olacaqtır», – dep bildirdi Altın.

Bunen beraber, institut «Bağçasaray – barışıq tarihı şeeri» (Qırımlı Cenevre) kontseptsiyası ve medeniyetlerara dialognıñ ögrenilmesiniñ ömürge keçirilmesi boyunca resurs aleti olacaqtır.

Avrasiya içtimaiy institutı Qırımda halq diplomatiyası merkezlerinden biri olacaqtır, çünki müessise tış memleketlerden ortaqlarnı celp etecek ve çeşit devletlerde öz leyhalarını ömürge keçirecek.

«Aliy oquv yurtunıñ teşkil etilmesi boyunca kiçik, amma birinci resmiy adım yapıldı. Kelecekte bir sıra teşkiliy meseleler (litsenziya, bina aluvı, professor-ocalar terkibiniñ teşkil etilmesi ve ilâhre) çezilecek, amma bunıñ hoş meseleler olğanını aytmaq mümkün», – dep qayd etti institut tesisçisi.

Фото аватара

Автор: Редакция Avdet

Редакция AVDET