Yalta memuriyeti yolbaşçısı Andrey Rostenko nevbetteki sefer yañı saylanğan Amerika Qoşma Ştatları prezidenti Donald Trampnı Yaltanı ziyaret etmege davet etti.
Bir yıl evel Andrey Rostenko o vaqıt AQŞ prezidenti vazifesine daa namzet olğan Trampqa ilk davetname yollağan edi, dep bildire Yaltada «Argumenti nedeli – Krım».
«Eminim ki, Qoşma Ştatlar prezidentine musafirçen taraflarımıznı ziyaret etmek meraqlı olur. Yalta, bir qaç sefer dünya seviyedeki eñ müim meselelerniñ muzakere etilmesi içün meydançıq olğan edi. Belki, bu sefer de küneşli Qırım toprağı esas ve müim qararlarnıñ alınması içün bir yer olur», – dep ayttı Rostenko.
Bunen beraber, Rostenko bütün Amerika halqını saylavlar yekünlenmesinen hayırladı ve AQŞ prezidenti Donald Trapmqa o qadar mesüliyetli bir vazifede muvafaqiyetli işler tiledi.
