Ağlarda «Qırımtatar kolhozı aqqında kino-oçerk» serlevalı cenkten evelki Qırımda qırımtatarlarnıñ ayatı aqqında arhiv videosı peyda oldı.
Sessiz film, Şarqiy Qırım dağları arasındaki «Güller vadiysinde» yerleşken Molotov adına qırımtatar kolhozındaki evlerni kösterip, qırımtatarlarnıñ ömür tarzı aqqında añlata.
Videoda qırımtatarlarnıñ ananeviy faaliyet çeşitleri kösterile: bağçacılıq, qoy asravcılığı, yüzümcilik, tütüncilik.
Kolhozda «agronom ilmi» ögrenilgen şahsiy ameliyathane bile bar edi.
180 gektar bağça ve bağ, 25 gektar tütün tarlaları, tahminen 4 biñ ayvan — Molotov adına kolhoz böyle baylıqlarnıñ saibi edi.
Sessiz film qırımtatarlarnıñ işten boş vaqtını da, olarnıñ yırlağan, oynağan ve muzıka aletlerini çalğanlarını köstere.
