Nariman Celâl, Qırımda cemaatçılar daa çoq sıqıştırılacaq, dep ayta

12.11.201614:10

Qırımda cemaatçılarğa qarşı basım devam etecek. Bu, Qırımtatar Milliy Meclisi faaliyetiniñ yasaqlanması aqqında mahkemeniñ qararına esaslanacaq.

Bu aqta ATR telekanalınıñ yayınında milliy areket iştirakçisi Nariman Celâl bildirdi.

Onıñ fikrince, Qırımda adam adiy bir sual içün mesüliyetke celp etile bile: «Meclis azası olasıñızmı?», yani Rusiyede mahkeme qararınen yasaqlanğan teşkilâtnıñ azası.

«Biz FSB taqiqatçısında sorğuğa çekildik, o, özümni Meclis azası dep adlandırmamağa tevsiye etti, akis alda cinaiy iş açılacaqtır», – dep añlattı Celâl.

Bunen beraber, qırımtatar faali hatırlattı ki, Meclisniñ qararına binaen, teşkilâtnıñ faaliyeti Ukraina qıtaiy qısmına keçirildi.

«Biz anda (Qırımda, – Avdet) Sovet vaqtında peyda olğan ve şimdi de bar olğan milliy areket faalleri, iştirakçileri olamız. Sayımız 33-ten ziyade oldı», dedi o.

Фото аватара

Автор: Редакция Avdet

Редакция AVDET