Ahtem Çiygoznıñ adliyecisi Nikolay Polozovnıñ fikrince, Qırım yuqarı mahkemesi Çiygozğa qarşı qabaatlayıcı üküm çıqaracağından şübe yoqtır.
Böyle fikirni Polozov noyabr 15-te Qırım.Aqiqatqa bergen intervyusında bildirdi.
Nikolay Polozovnıñ qayd etkenine köre, mahkemeciler «endi özüni tutmay, qabaatlayıcı tarafını tuta», ve, Çiygoznıñ kütleviy nizamsızlıq teşkil etüvinde iştirak etkenini tasdıqlamağan şaatlarnıñ çoqusı bergen ifadelerine baqmadan, mahkeme bir qaç «sırlı şaatnıñ» malümatına esaslanacaqtır.
Ahtem Çiygoz Aqmescit SİZO-sında 2015 senesi yanvar ayından başlap buluna, o, Rusiye Federatsiyası Cinaiy kodeksiniñ 212 maddesi 1-ci qısmı («kütleviy nizamsızlıqnı teşkil etüv») boyunca qabaatlana, madde boyunca qabaatlanğan kişi 10 yılğa qadar apiske qapatıla bile.
2016 senesi aprel 26-da Qırım Yuqarı mahkemesi Qırımtatar Milliy Meclisiniñ ekstremistik teşkilât olğanını tanıdı ve Rusiyede onıñ faaliyetini yasaq etti. Sentâbr 29-da Rusiye Yuqarı mahkemesi Meclisniñ yasaq etilmesi aqqında Qırım Yuqarı mahkemesiniñ qararını tasdıqladı.
