Qırımtatarlar toplu yaşağan Aqmescitteki Bor Çoqraq (Fontanı) qasabasınıñ sakinleri toplaşuv keçirdi, merasimde «dört prezidentniñ mektebi» adınen belli olğan bu yerde qurulğan mektepniñ statusı meselesi muzakere etildi.
«Qırımtatar tili, devlet tili ola, qasabamızda ise, qırımtatarlar, ealiniñ esas qısmı ola», – dep ilân etti toplaşuvnıñ iştirakçilerinden biri İzzet Gafarov.
Avdet elde etken malümatqa binaen, toplaşuv neticesinde rezolütsiya qabul etildi, vesiqa boyunca, qurulğan oquv yurtunıñ statusı, Qırım müendislik ve pedagogika universiteti imayesinde qırımtatar tilinde tasil berüv ile «Mektep-litsey» oquv-terbiyelev kompleksi olaraq belgilenmesi talap etilecek. Bundan da ğayrı, qasaba sakinleri, mektep müdiri ve ocalar terkibi belgilenmesi meselesinde olarnıñ fikri de köz ogüne alınmasını talap ete.
«Mektep müdiri, mektep qurulıp başlağanda planlaştırılğanına köre, qırımtatar tilini mükemmel bilgen mütehassıs olmalı», – dep ayta toplaşuv iştirakçileri.
«Bütün bu seneler devamında ümüt etken edik ki, mektep quruluvı bitirilgen soñ, balalarımız ve torunlarımız bu yerde ana tilinde oquycaq. Lâkin, mektepniñ işke tüşürilmesi yaqınlaşqanda, mektep qırımtatar olmaycağı ve onıñ müdiri vazifesine qırımtatar olmağan bir kişi tayinlenecegi aqqında çeşit türlü laflar eşitmege başlağanda şaşıp qaldıq», – dep ayttı Qırım müendislik ve pedagogika universitetiniñ ocası Rasim Bekirov.
Avdetniñ bundan evel bildirgenine köre, Aqmescitteki Bor Çoqraq qırımtatar qasabasında mektepniñ qurucılığı yekünlene. Mektepni kelecek sene açmağa söz bereler.
Sentâbr ortasında Qırım paytahtında qapalı toplaşuv keçirildi, bu yerde mektep müdiri belgilendi. Aqmescit memuriyetiniñ reisi Gennadiy Baharevniñ yolbaşçılığındaki komissiya qırımtatar namzetlerinden iç birini saylamadı.
