Yaltada «Hizb ut-Tahrir işi» boyunca yaqalanğan Arsen Cepparov hastahaneniñ cerrahiy (hirurgik) bölügine ketirildi.
Bu aqta noyabr 17-de qırımtatar faali İlmi Umerov haber etti.
«Cepparov altıncı şeer hastahanesiniñ cerrahiy bölügine keçirildi. Onıñ furunkulözı bar, cerrahiy ameliyat yapılması kerek», – dep añlattı Umerov «Qırım.Aqiqatqa» bergen intervyusında.
«Hizb ut-Tahrir işi» boyunca Yaltada ilk qabaatlanğanlar 2016 senesi fevral 11-de yaqalandı. Olardan eñ belli olğan – İnsan aqları boyunca kontakt gruppasınıñ azası Emir-Üsein Kuku. Ondan ğayrı, qurucı olaraq çalışqanlar Aluştalı Muslim Aliyev ve Qızıltaş (Krasnokamenka) köyü sakini Enver Bekirov, bunen beraber, çiçekler satqan Yaltalı Vadim Siruk yaqalandı.
Olar yaqalanğan soñ, Qızıltaş köyünde bu iş boyunca daa eki yerli sakin yaqalandı: Arsen Cepparov ve Refat İslâmov. Ekisi de – yaş balalar – 1990 senesi doğdı. Arsen, ocaqçı ve qurucı olaraq çalışqan edi, Refat ise, ticariy temsilci edi.
Avdetniñ evel bildirgenine köre, «Hizb ut-Tahrir» işi boyunca Yaltada yaqalanğan altı kişi mecburiy psihiatrik ekspertizadan keçirilecek.
