«Hizb ut-Tahrir» işi boyunca Yaltada yaqalanğan altı kişiden biri olğan Muslim Aliyev noyabr 17-de psihiatrik hastahanege ketirildi.
Bu aqta adliyeci Emil Kurbedinov Facebook saifesinde bildirdi.
Muslim Aliyev Aqmescitteki psihiatrik hastahaneniñ 15-ci bölüginde buluna.
Qırım adliyecisi Emil Kurbedinov, onıñ tarafından imaye etilgen musulman kişinen bağlanmağa tırışa. Kurbedinovnıñ tahminlerine binaen, mecburiy statsionar psihiatrik ekspertizağa «Hizb ut-Tahrir» işi boyunca Yaltada yaqalanğan altı kişi celp etilecek.
Bu sene fevral 11-12 künleri Rusiye uquq qoruyıcıları Qırım musulmanlarınıñ evlerinde bir sıra tintüvler keçirdi. Umumen olaraq, 14 adam tutulğan edi, olardan dört kişi yaqalandı: İnsan aqları boyunca kontakt gruppasınıñ azası, Yaltalı Emir-Üsein Kuku, Yalta rayonı sakini Enver Bekirov, Aluşta regionınıñ sakini Muslim Aliyev ve Yaltalı Vadim Siruk.
Olar, Rusiye Federatsiyası Cinaiy kodeksi 250.5 maddesiniñ 2-ci qısmı («Terroristik teşkilâtnıñ faaliyetini teşkil etüv ve böyle teşkilâtnıñ faaliyetinde iştirak etüv») boyunca qabaatlana.
2016 senesi aprel ayında aynı «Hizb ut-Tahrir» teşkilâtınen bağlı olğanında şeklenilgen Refat Alimov yaqalandı.
Qırım Yuqarı mahkemesi sentâbr 16-da «Hizb ut-Tahrir» işi boyunca yaqalanğan Muslim Aliyev, Arsen Cepparov ve Refat Alimovnıñ apiste bulunma müddetiniñ dekabr 8-ge qadar uzattırılmasına qarşı şikâyet arizasını lâğu etti.
