Ahtem Çiygoznıñ işi boyunca tünevin keçirilgen mahkeme toplaşuvında zararlanğan kişi − Eyvaz Umerov − ilk sefer oña qarşı deliller ketirdi. Eyvaz Umerov şimdiki vaqıtta «Qırım Cumhuriyeti Regional milliy-medeniy qırımtatar muhtariyeti» cemaat teşkilâtınıñ yolbaşçısı ola.
Bu aqta adliyeci Nikolay Polozov bildirdi.
«Qabaatlavnıñ üçünci şaatı − Umerov Eyvaz Asanoviç. Onıñ delillerine köre, Çiygoz, zıncır yapqan qırımtatarlarğa «Bas» dep emir bergen edi. O, 77 zararlanğandan ve 48 şaattan birinci olıp Çiygozğa qarşı deliller ketirdi», − dep yazdı Polozov Twitterde.
Bundan da ğayrı, adliyeciniñ sözlerine binaen, Umerov sorğu keçirilgen vaqıtta Rusiyede yasaqlanğan teşkilât olaraq tanılğan Mecliske, onıñ liderlerine ve Ciygozğa «qarşı olğanını» açıq ilân etken edi.
«Bunen beraber o, şimdiki vaqıtta RF Devlet duması «deputatı» olğan Ruslan Balbek ile beraberlikte siyasiy faaliyetnen oğraşqanını tasdıqladı», − dep ayttı Polozov video muracaatında.
Avdetniñ bildirgenine köre, Ahtem Çiygoznıñ işi boyunca zararlanğanlar olaraq halq «samooboronası» azaları ve Ukraina İçki işler nazirliginiñ sabıq hadimleri sorğuğa çekile. Bu vaqıtqa qadar mahkemede sorğuğa çekilgen zararlanğanlarnıñ iç biri Çiygoznıñ qabaatını tasdıqlamadı, bazıları ise, onı ilk sefer körgenlerini ayttı.
Ahtem Çiygoz Aqmescit SİZO-sında 2015 senesi yanvar ayından başlap buluna, o, Rusiye Federatsiyası Cinaiy kodeksiniñ 212 maddesi 1-ci qısmı («kütleviy nizamsızlıqnı teşkil etüv») boyunca qabaatlana, madde boyunca qabaatlanğan kişi 10 yılğa qadar apiske qapatıla bile.
