Daa eki qırımtatar musulmanı mecburiy psihiatrik ekspertizağa alıp ketirilecek

24.11.20169:40

Noyabr 24-te daa eki qırımtatar musulmanı mecburiy psihiatrik ekspertizağa alıp ketirilecek.

Bu aqta Qırım adliyecisi Emil Kurbedinov bildirdi.

«Bu, «Hizb ut-Tahrir işi» boyunca yaqalanğan Qızıltaştan eki yigit – Refat Alimov ve Arsen Cepparov. Olardan birine yaqında ameliyat yapıldı ve o SİZO-da reabilitatsiyasız qaldırıldı», – dep bildirdi adliyeci.

Avdetniñ evel bildirgenine köre, «Hizb ut-Tahrir» işi boyunca Yaltada yaqalanğan altı kişiden biri olğan Muslim Aliyev noyabr 17-de psihiatrik hastahanege ketirildi.

«Hizb ut-Tahrir işi» boyunca Yaltada ilk qabaatlanğanlar 2016 senesi fevral 11-de yaqalandı.  Olardan eñ belli olğan – İnsan aqları boyunca kontakt gruppasınıñ azası Emir-Üsein Kuku. Ondan ğayrı, qurucı olaraq çalışqanlar Aluştalı Muslim Aliyev ve Qızıltaş (Krasnokamenka) köyü sakini Enver Bekirov, bunen beraber, çiçekler satqan Yaltalı Vadim Siruk yaqalandı.

Olar yaqalanğan soñ, Qızıltaş köyünde bu iş boyunca daa eki yerli sakin yaqalandı: Arsen Cepparov ve Refat İslâmov. Ekisi de – yaş balalar – 1990 senesi doğdı. Arsen, ocaqçı ve qurucı olaraq çalışqan edi, Refat ise, ticariy temsilci edi.

Avdetniñ evel bildirgenine köre, «Hizb ut-Tahrir» işi boyunca Yaltada yaqalanğan altı kişi mecburiy psihiatrik ekspertizadan keçirilecek.

Фото аватара

Автор: Редакция Avdet

Редакция AVDET