Astrahan mahkemesi Hayser Cemilevge nisbeten belgilengen memuriy nezaret aqqında qararnı lâğu etti. Bu, oña Rusiyeden çıqmaq içün ruhset bere.
Bu aqta noyabr 24-te rusiyeli adliyeci Nikolay Polozov Facebook saifesinde bildirdi.
«Esas delil – onıñ (Hayser Cemilevniñ – Avdet) Rusiye Federatsiyası organları tarafından iç bir şartı olmadan Ukraina vatandaşı olğanı tanılması», – dep yazdı Polozov.
Adliyeciniñ malümatına binaen, ceza müddeti yekünlengen soñ, «Hayser Cemilevniñ Rusiye Federatsiyası territoriyasında bulunmaq qanun boyunca aqqı yoq ve o, ecnebiy devlet territoriyasına ketmek kerek».
Bundan evel Astrahan Sovetskoye rayon mahkemesi Hayser Cemilev içün üç yıl memuriy nezaretni belgiledi.
Noyabr 25-te belli qırımtatar dissidenti ve uquq qoruyıcısı Mustafa Cemilevniñ oğlu Hayserniñ Astrahan şeerindeki 10-ci koloniyadan (apishaneden) azat etilmesi beklenile. Onı o yerden almaq içün, Astrahan şeerine onıñ apayı ve anası kelecek.
