Qırımğa kelgen türk eyyetiniñ azaları bugün Aqmescitte (Simferopol) Cuma cami quruluvı boyunca işler alıp barılğan meydançıqnı ziyaret etti.
Musafirler qurulacaq cami yerinde işler alıp barılmasınen tanış oldı.
Eyyetni Qırım müftisiniñ muavini Ayder İsmailov ve «Qırım birligi» cemaat teşkilâtınıñ reisi Seytumer Nimetullayev refaqat etti.
Bundan da ğayrı, bugün türk eyyeti Qırım paytıhtındaki Gagarin şeer bağçasını ziyaret etti, o yerde «Ebediy ateşke» çiçekler qoydı. Bu vaqıt Qırım Yuqarı mahkemesi binası yanında Ahtem Çiygozğa qol tutmaq içün kelgen qırımtatarlar tura edi.
«Mahkeme binası yanında üyle teneffüsi. Arqada mavı avtomobil türk eyyetini çiçekler qoymaq içün ketirdi, olar, bu yerde turğan qırımtatarlardan utanıp nazarlarını çevirgenler», – dep yazdı Qırımtatar Qurultayınıñ Merkeziy saylav komissiyasınıñ reisi Zair Smedlâyev Facebook saifesinde.
Türkiyeden eyyet Qırımğa noyabr 23-te keldi. Delegatlar arasında türk Avrasiya ükümetleri assotsiatsiyasınıñ reisi Hasan Cengiz, Türkiye prezidentiniñ temsilcisi İbragim Yerilli, Ankara şeer yolbaşçısınıñ muavini Ahmet Tunç ve digerleri oldı.
Bunen beraber, daa bir qaç delegatnıñ, bu cümleden, Adalet ve inkişaf partiyasından deputat, Türkiye prezidenti Recep Tayyip Erdoğannıñ mesleatçısı ve eki doğmuş ağası Mehmet Mutlunıñ kelmesi beklenile.
Türkiyeden kelgen musafirler Qırımda noyabr 25-ke, cuma kününe qadar bulunacaq. Eki kün içinde eyyet azaları yarımada ükümetinen körüşecek ola.
