Emil Kurbedinov, diversant dep aytılğan qırımtatar kişini imaye etecek

25.11.201612:30

Qırım adliyecisi Emil Kurbedinov Redvan Suleymanovnı imaye etecek, rusiyeli mahsus hızmetler onıñ bu sene avgust ayında Qırımda yaqalanğan ukrain diversantlarından biri olğanını ayta.

Bu aqta Emil Kurbedinov Facebook saifesinde bildirdi.

«Onıñ işi boyunca tafsilâtlı malümatnı ögrendim ve endi onı imaye etecem. Elbet, FSB, Suleymanov menim hızmetimni «red etkeni» aqqında apansızdan haber etmese», – dep yazdı o.

FSB tarafından paylaşılğan videoda 1989 senesi doğğan Zaporojyeli Redvan Suleymanov bildirdi ki, onı ukrain istihbaratı 2015 senesi oktâbr ayında celp etti. Oña sanki Aqmescit ava limanı va avtovokzalında patlatıcı aletlerniñ qoyulması içün yerlerni tapmaq vazifesi buyurılğan. Bunen beraber, o, rusiyeli arbiy bazalar aqqında malümat cıymaq kerek edi.

Aynı vaqıtta Meclis (Rusiye Federatsiyasında 2016 senesi aprel 26-da qabul etilgen qararınen yasaqlanğan) yolbaşçısı Refat Çubarov haber etti ki, Redvan Suleymanov, diversantlar dep adlandırılğan kişiler yaqalanğanından üç afta evel tutuldı. Onıñ soy-sopları Suleymanovnıñ yaqalanması aqqında bilgen, amma haber etmege qorqqan.

Avdetniñ bildirgenine köre, bu sene avgust başında Rusiye Federal havfsızlıq hızmeti hadimleri ilân etti ki, Qırımda sanki Ukraina Mudafaa nazirligi Baş istihbarat idaresi tarafından azırlanğan teraktnıñ ögüni kördiler. Operativ-qıdıruv tedbirleri neticesinde avgust 6-dan 7-ge keçer gecesi Ermeni Bazar (Armânsk) şeeri rayonında diversantlar gruppası yaqalandı. Terroristlerni tutmaq içün keçirilgen ameliyat devamında Rusiye FSB hadimi elâk oldı. Bundan soñ, FSB Qırım territoriyasında teraktlar azırlağanında şeklenilip yaqalanğan Yevgeniy Panovnıñ sorğudan çekilmesini paylaştı.

Фото аватара

Автор: Редакция Avdet

Редакция AVDET