Ukraina teşkiliy meselelerden sebep «Eurovision-2017» yır yarışını keçirmek aqqından marum etile bile.
Bu aqta Ukraina Milliy telekompaniyasınıñ baş müdiri vazifesini eda etken Aleksandr Harebin bildirdi.
«Oktâbr başında Avropa yayınlama birligi Ukraina Milliy telekompaniyasına «Eurovision-2017» yarışına azırlıq müddeti ve aman-aman lâğu etilmesi nisbeten qırmızı kartnı berdi», – dep bildirdi o.
Harebin sebeplerni ayttı – bürokratiya, qanun çıqarıcı aktlarınıñ mükemmel olmaması ve «bazı memurlarnıñ yarışqa nisbeten istihfaf ile davranması», dep bildire «TSN».
Aynı vaqıtta Aleksandr Harebin qayd etti ki, oktâbr ayı devamında müddet boyunca keç qaluv üç aydan bir ayğa qadar qısqartıldı.
Harebinniñ sözlerine binaen, Avropa yayınlama birligi, Ukraina Eurovision yarışını keçirmek aqqını alacaqmı, yoq soñ qararını dekabr 8-de keçirilecek baş assambleyada alacaq.
