Noyabr 29-da Moskva okrug arbiy mahkemesi Sankt-Peterburgda keçirilgen toplaşuvda Pskov vilâyetinde doğğan Dmitriy Mihaylovnı, «Hizb ut-Tahrir» rusiyeli bölüginiñ faaliyetini teşkil etkeni içün, 16 yılğa apiske qapattı.
Bu aqta RAPSİ agentligi bildire.
Davanıñ malümatına binaen, 2014 senesi mayıs ayından başlap iyün ayına qadar Rusiyede yasaqlanğan «Hizb ut-Tahrir» teşkilâtınıñ faaliyeti boyunca cinaiy iş çerçivesinde 30-dan ziyade insan yaqalandı. Olarnıñ arasında teşkilâtnıñ yetekçileri ve azaları bar. Olarnıñ bazıları taqiqat astında buluna, digerleri mahküm etildi.
«FSB-nıñ Sankt-Peterburg ve Leningrad vilâyeti boyunca idaresiniñ malümatına binaen, teşkilâtnıñ yetekçileri Dağıstanlı karate bala idmancısı İsa Ragimov ve Pskov vilâyetinde doğğan, islâmnı qabul etken Dmitriy Mihaylov oldılar. Olar 2015 senesi aprel ayında yaqalandı», – dep aytıla agentlikniñ beyanatında.
