Qırımda Fevqulade vaziyetler nazirliginiñ (FVN) hadimi «Kezlev suvutqan kombinatı» territoriyasında ateşni söndürgende elâk oldı. Daa bir yaralanğan yanğıncı Kezlev (Yevpatoriya) şeer hastahanesine ketirildi.
Fevqulade vaziyetler nazirliginiñ Qırım baş idaresiniñ bildirgenine köre, şeerniñ sanayı zonasında tuman dağılması aqqında malümat FVN nevbetçi noqtasına saat 8.56-da bildirildi.
Qurtarıcılarğa obyektte adamlar, eki ya da üç insan, ola bilecegi aqqında haber etildi. Qurtarıcılar yanğın ocağından eki insannı çıqarmağa yetiştirdi, amma qaytqanda yanğan dam abdarıldı.
Neticede ayrı noqta yanğıncısı, içki hızmet serjantı David Saruhanov elâk oldı. FVN-niñ ekinci qurtarıcısı Aleksey Şukovskiy hastahanege alıp ketirildi.
«Eki insannı qurtarıp oldıq. Olarnı çıqardıq. Amma «Çıq!» emiri berildi, biz çıqmağa başladıq. Yetiştirmedik. Şerigim taş tübünde qaldı, meni bu taş tek biraz tiydi», – dep añlattı sağ qalğan qurtarıcı.
Elâk olğan David Saruhanov hızmetke 2010 senesi kirdi. Onıñ apayı ve üç balası qaldı.