«Hizb ut-Tahrir» işi boyunca Yaltada yaqalanğan musulman psihiatrik hastahanege ketirildi

02.12.201611:05

«Hizb ut-Tahrir» işi boyunca Yaltada yaqalanğan Vadim Siruk 1 sanlı Qırım cumhuriyet klinik psihiatrik hastahanede buluna.

Bu aqta dekabr 1-de onıñ apayı Anna Bogaçeva Facebook saifesinde bildirdi.

«Bugün oña mahsulat teslim etip oldıq. Hadimler ayta ki, o yerde yahşı aşatalar, amma ötmeknen problemalar bar», – dep yazdı Bogaçeva.

Avdetniñ evel bildirgenine köre, «Hizb ut-Tahrir» işi boyunca Yaltada yaqalanğan altı kişiden biri olğan Muslim Aliyev noyabr 17-de psihiatrik hastahanege ketirildi.

Noyabr 24-te daa eki qırımtatar musulmanı Refat Alimov ve Arsen Cepparov mecburiy psihiatrik ekspertizağa alıp ketirildi.

«Hizb ut-Tahrir işi» boyunca Yaltada ilk qabaatlanğanlar 2016 senesi fevral 11-de yaqalandı.  Olardan eñ belli olğan – İnsan aqları boyunca kontakt gruppasınıñ azası Emir-Üsein Kuku. Ondan ğayrı, qurucı olaraq çalışqanlar Aluştalı Muslim Aliyev ve Qızıltaş (Krasnokamenka) köyü sakini Enver Bekirov, bunen beraber, çiçekler satqan Yaltalı Vadim Siruk yaqalandı.

Фото аватара

Автор: Редакция Avdet

Редакция AVDET