2014 senesi fevral 26-da Qırım Yuqarı şurası binası yanında miting keçirilgen vaqıtta Ahtem Çiygoz iç qanunsız areketler yapmadı.
Bunı dekabr 1-de mahkemede sorğuğa çekilgen şaat ayttı.
Nikolay Polozovnıñ bildirgenine köre, mahkeme toplaşuvınıñ 50-nci künü şaat olaraq Valeriy Gritsay sorğuğa çekildi, qaysı biri o vaqıt Ukraina İçki işler nazirliginiñ Qırım Muhtar Cumhuriyetinde içtimaiy havfsızlıq teminlemesi idaresiniñ yolbaşçısı edi, şimdi ise Rusiye İçki işler nazirliginde aynı vazifeni eda ete, dep bildire «Qırım.Aqiqat».
«Onıñ malümatına köre, miting keçirilecegi aqqında haber onıñ arfesinde, fevral 25-te alındı, militsiyanıñ içtimaiy nizam saqlavı boyunca tedbirlerni azırlamaq içün keregi qadar vaqtı bar edi. Saba saat 8-de militsiya hadimleri bina yanında toplaştı. Bir qaç sefer Ahtem Çiygoznı kördim, o, qanunsız areketler yapmadı», – dep qayd etti adliyeci.
Ahtem Çiygoz Aqmescit SİZO-sında 2015 senesi yanvar ayından başlap buluna, o, Rusiye Federatsiyası Cinaiy kodeksiniñ 212 maddesi 1-ci qısmı («kütleviy nizamsızlıqnı teşkil etüv») boyunca qabaatlana, madde boyunca qabaatlanğan kişi 10 yılğa qadar apiske qapatıla bile.
